Ish ambasadori Avni Arifi, ka folur për Gazeta Blic për dialogun Kosovë-Serbi, Asociacionin dhe deklaratën e kryetarit të Kuvendit, Glauk Konjufca, se nëse nuk bëhet Asociacioni sipas Kushtetutës, Kosova duhet t’i thotë mirupafshim dialogut.
Ai thotë se Qeveria Kurti që nga fillimi i dialogut dhe ende po merr vendime naive, që e kanë sjellë Kosovën në rrugë pa zgjidhje.
“Qeveria Kurti që nga fillimi i dialogut po merr në vazhdimësi pozicione të paqëndrueshme dhe krejt naive që në vazhdimësi janë duke sjellë Kosovën në një situatë të pa rrugëdalje. Të gjitha veprimet në veri dhe sjellja në dialog janë euforike të pamenduara në kuptim të veprimeve e sidomos pasojave që ato sjellin. Kur e them këtë i mendoj të gjitha veprimet prej përpara targave, largimi i serbëve nga institucionet e deri qëndrimet në luhatëse për asociacionin”, shprehet ai.
Sipas Arifit, VV të jep përshtypjen se është ende peng i qëndrimeve të mëhershme për dialogun.
“Është e paqartë pse kjo mungesë totale e vizionit, objektivave dhe strategjisë në dialog. Nganjëherë krijohet përshtypja se VV është peng i qëndrimeve të mëparshme karshi dialogut e nganjëherë nuk e din se çka dhe për kë po punojnë!! Kosova ka pas konsensus ndërpartiak se Asociacion do të ketë (me përjashtim të VV) por pa kompetenca ekzekutive por me këtë qasje të VV dhe Kurtit s’do të ishte befasi asnjë version tjetër i propozuar”, vlerëson Avni Arifi.
Ai thekson se është gabim të mendohet se mund të dalë një statut adekuat, me draftin e propozuar aktualisht, teksa shton se Kurtit në dialog i ka humbur tërësisht busulla.
“Është gabim të mendohet se me statutin aktual të propozuar mund të dalë një statut adekuat. Më mirë të hidhej dokumenti në terezi se sa që njëherë u shkarkua e pastaj u lirua ekipi menaxhues. Po e them edhe njëherë, totalisht Kurtit në dialog i ka humbur tërësisht busulla, nëse e ka pasur ndonjëherë në kontroll”, deklaron Arifi.
