Komisioni për Shëndetësi dhe Mirëqenie Sociale, ka votuar Projektligjin për çmimin e njëjtë të barnave në të gjitha barnatoret e vendit, raporton InLajmi.
Deputeti i Partisë Demokratike të Kosovës, Bekim Haxhiu, theksoi nevojën e këtij projekligji për rregullimin e çmimit të barnave ndërsa shtoi se ky model i favorizon kompanitë e mëdha dhe i vështirëson kompanitë e vogla.
“Është e vërtetë që Kosova ka nevojë për ligjin për rregullimin e çmimit të barnave dhe është më se e vërtetë se ne si parti e kemi dorëzuar projektligjin e propozuar të njëjtin ligj një vit më parë, që mazhoranca nuk e ka miratuar. Ky projektligj i favorizon oligarkët farmaceutikë. Ky model i favorizon kompanitë e mëdha dhe i vështirëson kompanitë e vogla. Unë mendoj që do të duhej të ishte njëkohësisht Ligji për Pajisje dhe Produkte Medicinale. Unë mendoj që duhet ta trajtojmë me seriozitet këtë çështje, jo ta bëjmë këtë ligj për debate politike. Këto dy ligje duhet të trajtohen njëkohësisht”, u shpreh ai.
Sipas tij, çështja e çmimeve duhet të rregullohet, e jo të ndryshojnë çmimet çdo ditë.
“Çështjen e çmimeve ta rregullojmë njëherë e mirë këtë punë, jo paradite të ketë një çmim, ndërkaq natën kur ka më pak barnatore hapur, një çmim tjetër. Nuk është qëllim i ligjit nëse është në harmoni me direktivat e Bashkimit Evropian, por të bëhet një zgjidhje për Kosovën. Mbështetjen tonë do ta keni nëse e merrni parasysh projektligjin që ne e kemi dorëzuar në Kuvend që ta pasurojmë këtë ligj, pra ta kemi vullnetin si deputetë që ta rregullojmë atë”, tha Haxhiu. /InLajmi/
