Presidentja e vendit Vjosa Osmani, është pritur në takim nga Papa Françesku në Selinë e Shenjtë, me të cilin kanë biseduar për raportet e Kosovës me Vatikanin, përcjell InLajmi.
Osmani e ka njoftuar Papa Françeskun për vendosmërinë e Kosovës për ta kultivuar e promovuar më tej paqen, harmoninë dhe bashkëjetesën ndërmjet njerëzve.
Tutje, ajo gjatë takimit ia ka përmendur edhe synimin e Kosovës që ta ketë njohjen edhe nga Vatikani.
Gjithashtu presidentja e ka falënderuar Papa Françeksun për vendimin e tij për Administratën Apostolike.
Postimi i plotë i saj:
E lumtur të pritesha në audiencë private nga Papë Françesku në Selinë e Shenjtë.
Papën e njoftova me vendosmërinë tonë për ta kultivuar e promovuar më tej paqen, harmoninë dhe bashkëjetesën ndërmjet njerëzve, si vlera të popullit tonë, mbi të cilat janë kultivuar e ruajtur prej afro dymijë vjetësh edhe raportet tona me Selinë e Shenjtë. Në mënyrë të veçantë e falënderova Atin e Shenjtë për kujdesin që ai po tregon ndaj Kosovës dhe e falënderova për vendimin e tij të para pesë vjetëve, që Administratën Apostolike ta ngrinte në nivel të dioqezës. Ishte kënaqësi e veçantë po ashtu që të shkëmbeja me të pikëpamjet mbi orientimin euroatlantik të Kosovës dhe progresin e vendit tonë drejt këtij synimi.
Thellimi i mëtejmë raporteve me Vatikanin dhe zgjerimi i bashkëpunimit në shumë fusha janë orientim yni i përbashkët. Synimi i Kosovës për njohje nga Vatikani kontribuon në këtë drejtim dhe në avancimin e mëtejmë të raporteve tona shekullore. /InLajmi/
