Në moshën 73 vjeçare ka ndërruar jetë Edi Shukriu, një emër i njohur dhe i çmuar në fushën e arkeologjisë, të historisë, të letërsisë, të angazhimeve politike e kulturore në Kosovë dhe në mbarë hapësirën shqiptare, përcjell InLajmi.
Kështu fillon njoftimi për vdekjen e arkeoloes së pare Edi Shukriu, nga Akademia e Shkencave të Kosovës.
“Me dhembje dhe pikëllim të thellë njoftojmë opinionin se më 17 janar 2023 ndërroi jetë akademike Edi Shukriu, një emër i njohur dhe i çmuar në fushën e arkeologjisë, të historisë, të letërsisë, të angazhimeve politike, institucionale dhe kulturore në Kosovë dhe në mbarë hapësirën shqiptare”, thuhet në njoftimin e ASHK-së
Bëhet e ditur se varrimi i të ndjerës do të bëhet më 18 janar 2023, ora 15:00, në varrezat katolike të qytetit të Prizrenit, ndërsa mbledhja komemorative do të mbahet në mjediset e ASHAK-ut në orën 11:00, ndërkaq homazhet do të bëhen nga ora 12:00-13:00.
Kush ishte Edi Shukriu?
Edi Shukriu u lind në Prizren më 22 tetor 1950 nga prindërit Margarita (Gita) Mjeda-Shukriu dhe Muhamed Shukriu. Shkollën fillore dhe gjimnazin e kreu në Prizren, ndërsa studimet për arkeologji në Universitetin e Beogradit, 1972.
Magjistroi në Universitetin e Beogradit, 1979 dhe titullin Doktor i Shkencave Historike e mori në Universitetin e Prishtinës, 1990.
Punoi si profesoreshë ordinar në Fakultetin Filozofik të Universitetit të Prishtinës dhe. Ishte Kryetare e Këshillit të Kosovës për Trashëgimi Kulturore, KKTK, 2009-2012.
Edi Shukriu ishte arkeologia e parë dhe shkrimtarja e parë shqiptare në Kosovë që botoi përmbledhjen me poezi Sonte zemra ime festoon, 1972.
Anëtare e PEN qendrës së Kosovës, 2004 dhe nënkryetare e saj ,2009, anëtare e Shoqatës së Shkrimtarëve të Kosovës, 1973. Ishte shkencëtare vizituese në Universitetin e Harvardit. Mori pjesë në International Writing Program 2005, University of Iowa, USA 2005. Përfaqësohet në antologjitë e autorëve shqiptarë e të huaj.
Deputete e Kuvendit të Kosovës (1992-1998, 2002-2004), Bashkëdrejtuese e Departamentit të Kulturës–UNMIK, 2000-2001, Kryetare e Komisionit për Kulturë, Rini dhe Sport të Kuvendit të Kosovës 2001-2004. Nënkryetare e Alternativës Demokratike të Kosovës, 2004 – 2013. Ishte themeluese e Forumit të Gruas të LDK, 1990 dhe kryetare e saj, 1995-2000, si dhe organizatore dhe lidere e demonstratave të shumta të grave kundër regjimit serb.
Në dhjetor të vitit 2012 u zgjodh anëtare korrespondente e Akademisë së Shkencave dhe Arteve të Kosovës, ndërsa nga viti 2013 anëtare e Akademisë Europiane të Shkencave dhe të Arteve.
– Çmimi letrar “Beqir Musliu”, Ars Clubi “Beqir Musliu” 2019.
– Çmimi për Veprimtari Jetësore në fushën e trashëgimisë kulturore “Dea Dardanica”, Ministria e Kulturës Rinisë dhe Sportit, 2017.
– Çmimi i Shoqatës së Shkrimtarëve të Kosovës për veprën poetike “Nënqielli’, 1990.
– Çmimi “Gani Bobi” për librin shkencor “Dardania protourbane”, Dukagjini, Pej, 1996./InLajmi/
