Presidenti i Shqipërisë, Bajram Begaj ka zhvilluar një takim me Papa Françeskun, me të cilin kanë biseduar për çështje të ndryshme sa i përket Shqipërisë, përcjell InLajmi.
Begaj i ka shprehur mirënjohje Papa Françeskut për gjithçka që shteti i Vatikanit ka bërë për popullin shqiptar.
Gjithashtu në këtë takim u fol edhe për marrëdhëniet shumë të mira mes Selisë së Shenjtë dhe komunitetit katolik të Kosovës.
Në fund, Begaj njofton se e ka ftuar Papa Françeskun për një vizitë në Shqipëri.
Postimi i plotë i tij:
📍VATIKAN – Takimi me Papa Françeskun sot ishte një emocion i veçantë e që sjell në vëmendje marrëdhëniet historike e shumë shekullore mes shqiptarëve dhe Selisë së Shenjtë.
Shpreha mirënjohje për gjithçka që Shteti i Vatikanit ka bërë për popullin shqiptar, sidomos pas ndryshimeve demokratike në vitet ’90.
Vlerësimet e Papës për bashkëjetesën dhe harmoninë ndërfetare në Shqipëri i bëjnë krenarë të gjithë shqiptarët. Vendimet e Papa Françeskut dhe të Selisë së Shenjtë për shenjtërimin e Nënë Terezës dhe lumturimin e 38 martirëve të Kishës Katolike të Shqipërisë shqiptare janë një vlerësim për kombin si dhe historinë tonë, ku sakrifica dhe solidariteti janë pjesë e pandashme e saj.
Biseduam për rrugëtimin e Shqipërisë në kuadrin e procesit të integrimit evropian si dhe rëndësinë e kultivimit të vlerave njerëzore e shpirtërore, që janë themeli i shoqërisë sonë.
Kosova si dhe marrëdhëniet shumë të mira mes Selisë së Shenjtë dhe komunitetit katolik të Kosovës ishte pjesë e bisedës, ndërsa diskutuam edhe për zhvillimet në rajonin e Ballkanit Perëndimor dhe ndikimin e agresionit rus në Ukrainë për rajonin.
Ftova Atin e Shenjtë për një vizitë në Shqipëri, duke e siguruar se do të mirëpritej gjithmonë krahëhapur nga populli shqiptar. /InLajmi/
