Kanë mbetur vetëm 10-të ditë deri në fillimin e riregjistrimit të detyrueshëm të automjeteve me targa të Serbisë në targa RKS, ndërsa serbët nga veriu i Kosovës ende nuk e dinë nëse do t’i riregjistrojnë veturat e tyre sipas dekretit të Qeveria e Kosovës, ka thënë sot ish-ministri për Kosovën në qeverinë e Mirko Cvetkoviqit, Goran Bogdanoviq, transmeton InLajmi.
Bogdanoviq, i cili jeton në Leposaviq, ka thënë për agjencinë Beta, serbët nga veriu i Kosovës janë të ‘tronditur’ për shkak të dekretit të Qeverisë së Kosovës për riregjistrim të detyrueshëm, ashtu edhe për shkak të deklaratave të lidershipit serb se do të jetë një luftë dhe një “Furtunë” e re në Kosovë.
“Serbët nga veriu i Kosovës janë në dyshim dhe presin të marrin udhëzime nga Beogradi nëse do të riregjistrojnë veturat e tyre. Aktualisht, rreth 20-30% e pronarëve të automjeteve tashmë kanë targa RKS. Të gjithë serbët nga veriu i Kosovës që punojnë në jug të Ibrit kanë vetura me targa RKS”, tha Bogdanoviq.
Ai theksoi se në muajin e fundit një numër i madh i serbëve janë çregjistruar nga veriu i Kosovës dhe kanë regjistruar vendbanimin e tyre në Rashkë, Kragujevc dhe Beograd, për të riregjistruar veturat e tyre në ato qytete.
“Tashmë në veri të Kosovës ka më pak vetura me targa të Serbisë ‘KM’, mbizotëron RKS dhe targa nga Serbia qendrore. Me targat serbe ‘KM’, ‘PR’, ‘PE’, ‘PZ’, ‘GL’, ‘DJ’ është e pamundur të lëvizësh nëpër Kosovë, kështu që askush nuk duhet të gjykohet se kush e riregjistron një automjet në RKS”, ka thënë Bogdanoviq.
Ai ka theksuar se nuk do të ketë luftë e as “Stuhi” për shkak të riregjistrimit, siç kanë paralajmëruar Aleksandar Vuçiq dhe Petar Petkoviq.
”Shqiptarët nuk kanë asnjë interes për të filluar ndonjë konflikt apo ‘Stuhi’ në veri të Kosovës”. Gjithçka në veri të Kosovës është nën kontrollin e qeverisë së Kosovës, përveç arsimit dhe shëndetësisë. Qeveria aktuale në Beograd ia dorëzoi Prishtinës të gjitha atributet e shtetësisë: policinë, gjyqësorin, energjinë, vetëqeverisjen lokale, telekomunikacionin, pikat kufitare…”, theksoi ish-ministri.
Kujtojmë se Qeveria e Kosovës ka marrë një vendim më 29 qershor, duke i obliguar pronarët e veturave me targa të qyteteve serbe në Kosovë që të riregjistrohen me targa RKS.
Sipas vendimit të Qeverisë së Kosovës, afati i ri-regjistrimit të automjeteve me targa PR, KM, PZ, GL, UR, PE dhe DJ në RKS do të jetë nga 1 gushti deri më 30 shtator dhe nuk do të vazhdohet. /InLajmi/