Policia e Kosovës, ka bërë të ditur se sot në fshatin Llaushë, komuna e Skenderajt rreth orës 13:40 është arrestuar një burrë, si i dyshuar për vrasjen e gruas së tij, përcjell InLajmi.
Këtë e ka bërë me dije, Policia e Kosovës ku tutje ka njoftuar se viktima, 48 vjeçare ka ndërruar jetë pasi që është dërguar në spitalin rajonal të Mitrovicës, si pasojë e plagëve të rënda.
Personit të dyshuar i cili dyshohet se e ka kryer vrasjen i është sekuestruar arma, gjegjësisht janë gjetur 6 gëzhoja.
Personit të dyshuar pas intervistimit i është caktuar masa e ndalimit policor.
Njoftimi i plotë i Policisë së Kosovës:
Arrestohet një person i dyshuar për veprën penale “Vrasje e rëndë”
Skenderaj, 5 janar 2022
Sot, rreth orës 13:40, policia në Skenderaj, ka pranuar informacion për një plagosje nga arma e zjarrit e ndodhur në fshati Llaushë të Skenderajt.
Me të pranuar informacionin, në vendin e ngjarjes me urgjencë kanë dalë të gjitha njësitet e nevojshme policore.
Nga hetimet fillestare nga vendi i ngjarjes bëhet e ditur se personi i dyshuar ka shtënë me armë zjarri në drejtim të viktimës (gruas së tij) L.Q., 48 vjeçare, e cila kishte pësuar lëndime të rënda, të njëjtën me urgjencë e kanë dërguar në spitalin rajonal në Mitrovicë. Ndërkohë nga autoritetet spitalore është raportuar se viktima si pasojë e plagëve kishte vdekur.
Lidhur me veprën penale është arrestuar një person i dyshuar, nga i njëjti është sekuestruar një armë e llojit Pistoletë me 3 fishek, ndërsa në vendin e ngjarjes janë sekuestruar 6 gëzhoja.
Pas intervistimit të dyshuarit S.Q,.51 vjeçar, i është caktuar masa e ndalimit policor. Trupi i pajetë i viktimës është dërguar për obduksion në IML. /InLajmi/
