Besnik Tahiri nga Aleanca për Ardhmërinë e Kosovës, në seancën e jashtëzakonshme të Kuvendit të Kosovës, që është duke u mbajtur tani lidhur me vendimin e Qeverisë për masat e emergjencës në furnizimin e energjisë tha se kryeministri i Kosovës Kurti po e lë vendin në terr vetëm të marrë vota më shumë, raporton InLajmi.
“Një kryeministër që duhet të jetë i krejt Kosovës e lë Kosovën në terr vetëm e vetëm të marr vota më shumë. Duhet të merr vendime konkrete të rregulloj krejtësisht gjendjen me problemet e energjetike.
Propozimet si ‘Ngrohuni me qebe, fikni dritat. Dhe e fundit për mua më e habitshmja po lypë fajtor e s’po ofron zgjidhje. Nëse e shohim historinë ai ka qenë kundërshtari më i madh i energjisë elektrike. Duke i gjet behane secilit investor ekonomik”,tha Tahiri.
Sipas Tahirit, kryeministri Kurti po shkon pas pasojave e po i harron qytetarët.
“U pat zotu se do të ulë çmimin e energjisë elektrike derisa rrimë mbi këto kapacitete. Sot nga pozita e udhëheqësit qytetarëve po ua thotë troç, ka reduktime, ka shtrenjtim të energjisë elektrike. Ajo që na shqetëson më shumë është fakti se Qeveria dhe kryeministri Kurti po shkon pas pasojave por po harron se qytetarët e kanë votuar të ju prijë punëve. Qeveria po vepron pasi që po ndodhë problemi, derisa tërë kohën po e kërkon fajtorin dhe nuk po ofron zgjidhje”,shtoi ai ./InLajmi/
