Presidenti Joe Biden ka mbajtur një takim virtual nga Shtëpia e Bardhë, ku edhe ka thënë se disa spitale amerikane mund të “mbyten” nga rastet e Covid, por vendi në përgjithësi është i përgatitur mirë, transmeton InLajmi.
“Omicron është një burim shqetësimi, por nuk duhet të jetë burim paniku”, tha ai.
Në një takim virtual të organizuar nga Shtëpia e Bardhë me disa guvernatorë shtetërorë dhe këshilltarë të lartë shëndetësorë, Biden theksoi se përhapja e shpejtë e variantit Omicron nuk do të kishte të njëjtin ndikim si shpërthimi fillestar i Covid-19 në 2020 ose rritja e Delta këtë vit.
Testimi është më i disponueshëm dhe vaksinimet masive nënkuptojnë se për shumë njerëz infeksionet nuk çojnë në sëmundje serioze.
Sipas Biden, amerikanët dhe Amerika kanë bërë përparim dhe tani gjërat janë më mirë.
Biden pranoi se pavarësisht rritjeve në kapacitetin e testimit, ende nuk është e mjaftueshme pasi ka pasur shumë njerëz që kanë dashur të bëjnë testime dhe ka qenë e vështirë këtë fundjavë, për shkak të numrit.
“Duke parë se sa e vështirë ishte për disa njerëz të bënin një test këtë fundjavë tregon se ne kemi më shumë punë për të bërë,” tha ai.
Si pjesë e përpjekjes, qeveria amerikane po blen 500 milionë teste në shtëpi për t’i shpërndarë amerikanëve, shkruan France 24.
“Nuk është e mjaftueshme. Është e qartë se nuk mjafton. Nëse do ta dinim, do të kishim bërë më shumë, më shpejt,” tha ai.
Përndryshe Shtetet e Bashkuara kanë pësuar një numër të rasteve më të lartë se çdo komb në botë, me më shumë se 816,000 vdekje të regjistruara nga Covid dhe 52 milionë raste. /InLajmi/
