I pari i komunës së Drenasit, Ramiz Lladrovci, ka reaguar pas deklaratës së kryeministrit të vendit, Albin Kurti, ku ky i fundit ishte thënë së “krimi ka zbritur në nivel lokal”, përcjell InLajmi.
Lladrovci ka thënë se nëse do të kishte ligj dhe drejtësi në vend do të duhej të intervistohej kryeministri nga Prokurori i Shtetit për “krimin në pushtetin lokal”, sipas tij deklaratave të tilla duhet bashkangjitur fakte.
Tutje ai shtoi se kjo është metodë e ikjes nga përgjegjësitë për t’iu shmangur problemeve reale të pushtetit lokal, e që sipas tij kjo nuk është rruga që të dërgon drejt zgjidhjes së problemeve të qytetarëve.
Ai i ishte drejtuar kryeministrit të vendit organizata që ju e drejtoni jo vetëm se do të mbetet e vogël në nivel lokal, por shumë shpejt do të bëhet e vogël edhe në nivel qendror.
Postimi i plotë i tij:
Kryeministër Kurti,
Me keqardhje e lexova në portale se ju keni deklaruar sikur “krimi ka zbritur në nivel lokal”. Qëndrim tepër zhgënjyes për një kryeministër që nuk bën dallimin e liderit të një partie dhe kryeministrit të vendit për të gjithë qytetarët dhe pushtetin lokal.
Po të kishte shtet ligjor dhe të së drejtës, Ju do të duhej sot të intervistoheshit nga Prokurori i Shtetit për “krimin në pushtetin lokal”, sepse në shtet ligjor, deklaratave të tilla do të duhej t’i bashkëngjitni fakte.
Gjetja e armiqve të rinj të Qeverisë që ju drejtoni, është shmangie nga zgjidhja e problemeve reale të pushtetit qendror. Kjo metodë e ikjes nga përgjegjësia është e njohur, por, nuk është rruga që zgjidh çështjet jetike të qytetarëve.
Me këtë qasje, z. Kryeministër, organizata që ju e drejtoni jo vetëm se do të mbetet e vogël në nivel lokal, por shumë shpejt do të bëhet e vogël edhe në nivel qendror. /InLajmi/
