Si pasojë e variantit të ri të virusit, i quajtur Omicron janë anuluar mijëra fluturime për fundjavën e Krishtlindjeve, transmeton InLajmi.
Planet e udhëtimeve për pushime në të gjithë botën vazhdojnë të ndërpriten pasi infeksionet me Covid-19 janë duke u rritur.
Linjat ajrore kanë fajësuar mungesat e stafit të shëndetshëm për anulimin e afro 2.400 fluturimeve të premten dhe më shumë se 2.300 të shtunën në Amerikë.
Më shumë se 800 nga ata që u anuluan të shtunën ishin drejt aeroporteve amerikane.
Në Evropë, kufizimet e udhëtimit janë ndër masat që synojnë reduktimin e rasteve, të nxitura kryesisht nga varianti Omicron.
Pavarësisht gjetjeve të hershme se Omicron është më i butë se variantet e tjera, shkencëtarët janë të shqetësuar nga numri i madh i infeksioneve që po regjistrohen.
Shumë nga anulimet e fluturimeve janë rezultat i testimit pozitiv të ekuipazheve të linjave ajrore, prandaj janë detyruar të izolohen për të frenuar përhapjen.
Përveç kësaj ende priten vonesa dhe ndërprerje të mëtejshme të qindra fluturimeve të tjera, sipas faqes së internetit FlightAware.
Në Mbretërinë e Bashkuar, e cila edhe një herë ka numra rekord të rasteve të konfirmuara vullnetarët po përgatiten për një nxitje përforcuese të ditës së Krishtlindjes për të zvogëluar ndikimin e Omicron.
Në të gjithë Evropën, qeveritë po marrin masat e tyre për të luftuar rritjen. Italia, Spanja dhe Greqia e kanë bërë sërish të detyrueshme mbajtjen e maskës jashtë.
Katalonia, në verilindje të Spanjës, ka vendosur një shtetrrethim brenda natës.
Holanda hyri në një bllokim të rreptë në fillim të kësaj jave.
Gjermania ka thënë se do të kufizojë tubimet private në 10 persona dhe do të mbyllë klubet e natës nga 28 dhjetori. Ndeshjet e futbollit do të luhen me dyer të mbyllura.
Portugalia ka urdhëruar mbylljen e bareve dhe klubeve të natës nga 26 dhjetori dhe e ka bërë të detyrueshme punën nga shtëpia deri më 9 janar.
Departamenti i Shëndetësisë njoftoi se pasi shumica e popullsisë tani ishte ekspozuar ndaj koronavirusit, politika tani po kalon nga një strategji kontrolli në një strategji zbutjeje, duke përfshirë vetëmonitorimin, mbajtjen e maskave dhe distancimin social.
SHBA më herët njoftoi se do të heqë kufizimet e udhëtimit të vendosura në Afrikën e Jugut dhe 7 vende të tjera afrikane për shkak të shqetësimeve në lidhje me variantin Omicron më 31 dhjetor.
Udhëtarët nga Afrika e Jugut, Botsvana, Zimbabve, Namibia, Lesoto, Eswatini, Mozambiku dhe Malavi ishin bllokuar që nga 29 nëntori.
Eksperti më i lartë i sëmundjeve infektive në Amerikë, doktor Anthony Fauci, paralajmëroi në fillim të kësaj jave se udhëtimi i Krishtlindjeve do të rriste përhapjen e variantit edhe në mesin e të vaksinuarve plotësisht.
Megjithatë, planet e mijëra njerzëve u prishën pasi fluturimet në të gjithë vendin u anuluan ose u vonuan.
United Airlines tha se numri në rritje i rasteve të Omicron kishte “ndikuar drejtpërdrejt në ekuipazhet tona të fluturimit dhe njerëzit që drejtojnë operacionin tonë“, duke shtuar se po kontaktonte pasagjerët e prekur përpara se të vinin në aeroport, shkruan BBC News.
Në përgjithësi, linjat ajrore globale kanë anuluar më shumë 4.700 fluturime të planifikuara për t’u nisur të premten dhe të shtunën.
Në Australi, mijëra udhëtime festive u prekën të premten me më shumë se 100 fluturime të brendshme nga Sidnei dhe Melburni në qytete të tjera u anuluan. /InLajmi/
