Kriza energjetike e ka kapluar Kosovën, derisa avazi për reduktimet e energjisë elektrike ka disa ditë që është rikthyer përsëri si në vitet e pas luftës, shkruan InLajmi.
Derisa në fillim u tha se reduktimet do të jenë 8 me 2, pra 2 orë nuk do të kemi energji, kjo nuk ndodhi. Reduktimet po vazhdojnë edhe më shumë orë në disa lagje e qytetet të vendit tonë, por jo edhe për veriun.
Lidhur me këtë Qeveria e Kosovës ka ndarë së fundmi një shumë prej 20 milionë eurosh për të mbuluar vlerën e importit të energjisë, për të subvencionuar importin e energjisë për qytetarët, për konsumatorët.
Përmes këtij veprimi, nga Qeveria u tha se ky veprim është bërë për të mbrojtur qytetarët e Kosovës kur kriza është në pikën më të keqe.
“Qeveria ka marrë vendim që t’i kthejë dividencën prej 20 milionë euro euro për Operatorin e Sistemit, Transmisionit dhe Tregut të energjisë elektrike të Kosovës (KOSTT). Kjo është bërë me qëllim të ruajtjes së likuiditetit të ndërmarrjes dhe të sektorit”, ka thënë ministrja e Ekonomisë, Artane Rizvanolli.
Eksperti i ekonomisë, Musa Limani, tha se kriza energjetike nuk është veç në Kosovë por në mbarë botën derisa ritheksoi se problemi i energjisë elektrike është i trashëguar.
“Prandaj Qeveria aktuale nuk është fajtore sepse e ka trashëguar këtë krizë energjetike. Rreth rritjes së kapaciteteve të energjisë elektrike u diskutu shumë më herët. Bile në disa studime që i ka ba Qeveria e atëhershme ka qenë e paraparë të rriten në 2.000 megavat pastaj ka ran ë 1.200, në 500 megavat.
Gjendja problematike e energjisë është trashëguar nga Qeveria e tashme, s’mund ta ndryshojë për 6 muaj apo një vit”, tha Limani për Gazetën InLajmi.
Lidhur me ndarjen e 20 milionë eurove për KOSTT-in, Limani tha se është veprim i drejtë.
“Sido që të jetë qeveria aktuale ka vepruar drejt, subvencione për KOSTT-in është bërë që të përmirësohet gjendja e energjisë elektrike. Duhet të importohet energji nga Shqipëria, mund të na furnizojnë mendoj se kanë mjaftueshëm ujë”, tha tutje Limani.
Qeveria, sipas tij duhet të bëjë një zgjidhje sepse nga mungesa e energjisë elektrike po e pësojnë të sëmurët, fëmijët, po e pëson ekonomia, gastronomia e të tjerë sektorë.
“Është e dëmshme, reduktimet e energjisë po sjellin shumë pasoja si në shëndet e po ashtu edhe në ekonomi”,tha ai. Lindita Canolli-Fejzullahi /InLajmi/
