Ish-politikania serbe, Vesna Peshiq ka vlerësuar se Serbia është “faktori kryesor shqetësues” në Ballkan dhe se kjo shihet nga fakti se edhe sot “nuk i pranon kufijtë e saj”.
“Të gjitha vendet e ish-Jugosllavisë i kanë pranuar kufijtë e tyre, përveç Serbisë”, tha Peshiq në Forumin e 14-të për Drejtësinë Tranzicionale në Beograd.
Sociologia vlerësoi se Serbia nuk është e gatshme për asnjë pajtim. Ajo deklaroi se “proceset e shpërbërjes së fortë të Bosnjë e Hercegovinës përmes (Millorad) Dodikut janë në progres” dhe theksoi se “Serbia i jep mbështetje të plotë këtyre proceseve”.
“Nuk mendoj se Serbia aktualisht po përgatitet për luftë, por po përpiqet t’i arrijë qëllimet e saj në mënyrë paqësore. Ajo dëshiron ta përvetësojë një pjesë të Dejtonit të Bosnjë e Hercegovinës”, tha Peshiq, shkruan Danas.
Sipas saj, në Serbi kryen punë “autokracia personale”, me të cilën Aleksandar Vuçiq i mori në dorë të gjitha institucionet dhe e shpalli opozitën armike të brendshme, transmeton Gazeta Express.
“Situata në Serbi është kaq katastrofike dhe me atë lloj qeverisjeje që kemi ne nuk mund ta zgjidhim asnjë problem, madje as atë të Kosovës”, tha Peshiq.
