Presidentja e Republikës së Kosovës, Vjosa Osmani sot ka mbajtur fjalimin e saj vjetor para deputetëve të Kuvendit të Republikës të Kosovës, përcjell InLajmi.
Teksa deputetët e partive opozitare në përgjithësi kanë bojkotuar fjalimin e presidentes, për arsye të ndryshme, shumë pak prej tyre kanë qëndruar në sallë.
Arsye e mosqëndrimit në sallë të AAK-së, ishte mospajtimi për faktin se Presidentja e ka shkelur mandatin e vet si faktor uniteti, duke u bërë palë me Kryeministrin.
“Grupi Parlamentar i AAK-së, në shenjë mospajtimi dhe revolte për faktin se Presidentja e ka shkelur mandatin e vet si faktor uniteti, duke u bërë palë me Kryeministrin, ne si grup patlamentar refuzojmë ta dëgjojmë fjalën e Presidentes dhe e braktisim seancën”, thuhet në reagimin e AAK-së.
Ndërsa Partia Demokratike e Kosovës, si arsye të vetën e ka quajtur paaftësinë e presidentes Osmani për të ushtruar funksionin kushtetues të unitetit të popullit dhe shumë dështime të tjera sistematike.
“Për paaftësinë për të ushtruar funksionin kushtetues të unitetit të popullit dhe shumë dështime të tjera sistematike, sot Grupi Parlamentar i PDK-së, nuk do të qëndrojë në sallë për të dëgjuar adresimin e Presidentes Osmani”, kanë thënë ata.
Në sallë kanë qëndruar vetëm 6 deputetë nga opozita.
5 deputetë të LDK-së, Armend Zemaj, Anton Quni, Besian Mustafa, Hikmete Bajrami e Valentina Bunjaku.
Si dhe në sallë ka qëndruar edhe Albena Reshitaj, deputete e AAK-së./InLajmi/
