Halil Mehmetaj dhe 2 djemtë e tij, Kreshnik dhe Malsor Mehmetaj, u arrestuan mbrëmë si të dyshuar për vrasjen e trefishtë në Gllogjan të Deçanit, më 26 nëntor.
Motivi i kësaj vrasje dyshohet se lidhet me vetëvrasjen e studentes 20-vjeçare nga Gllogjani, vajzës dhe motrës së të arrestuarve, Heroina Mehmetajt, e cila i dha fund jetës së saj më 14 qershor 2020.
Pas arrestimit të 3 familjarëve, për herë ta parë, në emër të familjes Mehmetaj, ka reaguar djali tjetër i Halil Mehmetajt.
Ai e ka mohuar se babai dhe vëllezërit e tij të jenë përfshirë në këtë vrasje, duke deklaruar se ka dëshmi që e vërtetojnë këtë.
Gazeta Sinjali ka sigruruar deklaratën e tij, në të cilën ai thotë se në momentin kur ka ndodhur krimi në Gllogjan, babai i tij ka qenë me bashkëfshatarë, ndërkohë që vëllezërit, njëri sipas tij ka qenë në punë, e tjetri në shtëpi.
“Në emër të familjes tem,ju drejtohem të gjithëve se babai im dhe 2 vëllëzërit e mi janë të pafajshëm. Familja jonë nuk ka asnjë lidhje me vrasjen në Gllogjan. Babai ka dhjetëra bashkëfshatarë dëshmitarë që ka qenë me ta kur ka ndodhë tragjedia. Vëllau i vogël Malsori që thuhet se është i dyshuar, janë 100 dëshmi që e vërtetojnë prezencën e tij në vendpunim në Gjakovë. Janë kamerat e vendpunimit që dëshmojnë pafajsinë e tij. Vëllau i madh posedon dokumentacion ,fakte reale që ka qenë i operuar , kemi qenë të 2-të së bashku në shtëpi me nanën. Pafajësia e tyre , e jona si familje do të vërtetohet“,thuhet në reagim.
I mllefosur pas arrestimit të 3 familjarëve të tij, ai thotë se “njerëzit e fëlliqt, po dojnë me na flliq”, por që nuk dihet se për kë e ka fjalën.
“Turp për gjithë ata që ju gëzuan këtij arrestimi të njerëzve të pafajshëm. Babë s‘je dorëzu në luftë, mos u dorëzo në paqe, krenar me djemtë e tu të pastër si yje. Vëllëzërit e mij të dashtun mos e ulni kokën për asnjë sen. Se njerëzit e fëlliqt po dojn me na fëlliq, por s‘kanë me ja dalë. Jem krenarë me ju”, thuhet tutje në reagim.
Gazeta Sinjali mbrëmë raportoi se Halili me 2 djemtë e tij nuk dyshohen si doras të vrasjes së trefishtë. Sipas këtyre burimeve 3 të arrestuarit dyshohet se shtytën dhe ndihmuan në kryerjen e veprës penale “vrasje e rëndë”.
Sipas burimeve, i dyshuari i 4-të që është ende në arrati është i dyshuari kryesor për vrasjen e shoferit të autobusit dhe 2 nxënësve.
