Pas çertifikimit të zgjedhjeve të 14 shkurtit ka reaguar edhe kreu i Aleancës për Ardhmërinë e Kosovës, Ramush Haradinaj duke thënë se vendi ynë zhvilloi zgjedhje demokratike të cilat ngritën pozicionin e Kosovës në arenën ndërkombëtare, përcjellë InLajmi.
Haradinaj ka falenderuar të gjithë aktivistët dhe strukturat e Aleancës për punën e palodhur. Ai po ashtu ka thënë se përkundër propagandave të ndryshme me të cilat u sulmua Aleanca, qytetarët prapë vazhduan t’iu besojnë.
Postimi i plotë i tij:
Të nderuar qytetarë të Republikës së Kosovës
Vendi ynë zhvilloi zgjedhje me standarde të larta demokratike, që ngritën pozicionin e Kosovës në arenën ndërkombëtare.
Sot u certifikuan rezultatet e zgjedhjeve të 14 shkurtit.
Falënderoj të gjithë aktivistët dhe strukturat e Aleancës, për punën e vazhduar dhe të palodhur.
Falënderoj kandidatët tonë, nga vendi e diaspora, shumë prej tyre garues për herë të parë, të rinj e të reja që pasuruan me dijen e tyre organizatën tonë të përbashkët politike.
Falënderoj veçanërisht, 62.111 votuesit nga Kosova e diaspora, burra e gra që i besuan Aleancës për Ardhmërinë e Kosovës.
Ju, që përkundër propagandave të qarqeve të ndryshme me të cilat vazhdimisht u sulmua Aleanca, e që nuk u argumentuan asnjëherë, vazhduat të na besoni, ashtu siç e kthyem besimin tuaj me punë, duke i dhënë vendit Ushtrinë, tapitë e Trepçës, pavarësinë energjetike e shumë të tjera, vazhdoni të besoni në ne.
Aleanca që gjatë tërë historisë së saj politike, ka dëshmuar konsistencë në temat e interesit nacional, do të vazhdojë njëjtë dhe besimi juaj do të rezultojë edhe me më shumë punë të mira për shtetin tonë dhe të ardhmen e ndritur të tij dhe për mirëqenien e të gjithë qytetarëve.
Zoti e bekoftë Kosovën!
RH /InLajmi/
