Donika Gërvalla, kandidatja për deputete nga radhët e Iniciativës së Vjosa Osmanit, ka reaguar ndaj ish-emisarit Richard Grenell, ku ky i fundit gjatë ditës së djeshme e ka quajtur liderin e VV-së, Albin Kurtin , anti-amerikan, dhe anti SHBA-ve, përcjellë InLajmi.
Gërvalla ka thënë se Grenelli ka qenë një ambasador skandaloz dhe po aq skandaloz ka qenë si i dërguar i presidentit amerikan në Kosovë.
Po ashtu ajo ka shtuar se as Trumpi dhe as Grenelli nuk janë interesuar asnjë herë për Kosovën, ku sipas saj, ata interesohen vetëm për veten e tyre.
Postim i i plotë i saj:
Sipas të gjitha sondazheve ndërkombëtare, shqiptarët janë populli më proamerikan i këtij planeti. Jo vetëm Albin Kurti që jo se jo, por në Kosovë asnjë person që di të numërojë deri në tre nuk është kundër Amerikës. Arsyen e dimë të gjithë.
Në Gjermani Grenelli ka qenë një ambasador skandaloz dhe po aq skandaloz ka qenë si i dërguar i presidentit amerikan në Kosovë. Qytetarët amerikan i kanë larguar tashmë që të dy nga postet e tyre të larta. Të dy kanë tentuar më pas që zgjedhjet e lira në Amerikë të mos i pranojnë duke i quajtuar të manipuluara, gënjeshtra këto që kulmuan në sulmin e armatosur ndaj Kapitolit duke i shfaqur botës ndër imazhet më të shëmtuara që kemi parë ndonjëherë nga Amerika.
As Trumpi dhe as Grenelli nuk janë interesuar asnjë herë për Kosovën, ata interesohen vetëm për veten e tyre. Për fat të mirë, Grenelli mbetet vetëm një episod i shkurtër dhe i shëmtuar për vendin tonë.
Presidenti Biden është një mik i vërtetë i Kosovës. Në vend të gjuhës së presionit, administrata e re amerikane ofron mbështetjen e saj për sfidat e shumta që na presin. Këto janë marrëdhëniet normale mes Amerikës dhe Kosovës.
Sa mirë të dish që Grenelli është vetëm një kapitull i së djeshmes dhe që e vetmja gjë që i ka mbetur janë mesazhet në Twitter.
Zoti i ka bekuar Amerikën dhe Kosovën dhe miqësinë e tyre të përhershme. /InLajmi/
