Ushtruesja e detyrës së presidentes, Vjosa Osmani, së bashku me kryetarin e Lëvizjes Vetëvendosje, Albin Kurti, këtë të diele kanë bërë homazhe për të rënët në Likoshan e Qirez, raporton InLajmi.
Kurti dhe Osmani kanë kërkuar që të vihet drejtësi për viktimat dhe familjarët e tyre.
Osmani, është shprehur se kjo kujtesë historike dhe institucionale ndihmon që të kuptohet çmimi i lartë i lirisë që e pagoi populli i Kosovës.
“Jemi këtu së bashku me kryeministrin në ardhje për ta nderuar sakrificën dhe luftën çlirimtare, por edhe të gjithë të rënët dhe martirët. Kjo kujtesë historike dhe institucionale na ndihmon që ta kuptojmë çmimin e lartë të lirisë që populli i Kosovës e pagoi.”
Gjithashtu ajo ka theksuar se është moment kur ne duhet ta ngrisim zërin tonë për drejtësi për të gjitha viktimat e shkaktuara nga regjimi serb.
“Po ashtu është moment kur ne duhet ta ngrisim zërin tonë për drejtësi për të gjitha viktimat e shkaktuara nga regjimi serb. Vetëm duke kërkuar drejtësi dhe duke e kujtuar sakrificën ne do të mund ta ndërtojmë shtetin”,ka deklaruar Osmani.
Ndërsa Kurti ka thënë se është obligim institucional që për të gjitha viktimat dhe familjarët e tyre të vihet drejtësia duke i gjykuar dhe dënuar kriminelët që kryen gjenocid.
“Ne u kemi borxh sa nuk thuhet të gjithë atyre që dhanë gjithçka që ne të jetojmë të lirë. Por edhe drejtësia është mohuar dhe është obligim i yni që për të gjithë këta familjarë të sjellim drejtësi duke i gjykuar dhe dënuar kriminelët që kryen gjenocid. Emrat e tyre nuk harrohen kurrë, gjaku i tyre nuk humbet kurrë”,ka deklaruar Kurti. /InLajmi/
