Zgjerohet harta e përhapjes së variantit britanik të Coronavirusit nëpër botë. India dhe Pakistani konfirmuan rastet e para të infektimeve, të gjithë persona që janë kthyer nga Britania e Madhe.
Deri më tani janë 20 vende të botës që kanë konfirmuar rastet e infektimeve me mutacionin e koronavirusit të zbuluar fillimisht në Britaninë e Madhe dhe shumica janë vende evropiane. Në Britaninë e Madhe, ku prej ditësh qarkullon ky variant është shënuar rekord i ri infektimesh ditore, për të parën herë me mbi 40.000 raste.
Ndërsa në vendet e tjera evropiane, përfshirë edhe ato ku janë konstatuar raste infektimesh me mutacionin britanik infektimet vijojnë të jenë në kuota të ulëta. Gjermania raportoi 852 të vdekur ditorë, një shifër e lartë pranë rekordeve. Ky vend mban trofeun e vaksinimeve në Evropë me 42.000 injektime që prej të dieles, transmeton EO.
Autoritetet shëndetësore ruse korrigjuan shifrën e viktimave nga Covid-19, duke e 3-fishuar e duke e çuar në mbi 186.000. Sipas zyrtarëve në Moskë, këtë vit janë shënuar 230.000 vdekje më shumë se viti i kaluar dhe 80% e tyre janë shkaktuar nga koronavirusi.
