Programi i Kombeve të Bashkuara për Zhvillim (UNDP) në Kosovë do t’i dorëzojë sot pesë qenë Njësisë K9 të Policisë së Kosovës, përcjell InLajmi.
Ngjarja do të mbahet në Selinë e Policisë së Kosovës, duke filluar nga ora 11:00.
“Qentë e K9 të Policisë së Kosovës janë të trajnuar në zbulimin e barotit ose armëve të kontaminuara, teknologjitë e reja, duke përdorur materiale jo tradicionale siç janë polimeret, po përdoren gjithnjë e më shumë në prodhimin e armëve të vogla”, njofton UNDP.
Përmes projektit Ndihmë për Luftimin e Trafikimit të Armëve të Paligjshme (CIAT) në Kosovë, të financuar bujarisht nga qeveria gjermane, pesë qen K9 janë prokuruar për Policinë e Kosovës që do të trajnohen nga instruktorët e çertifikuar të K9 të policisë për nuhatjen e Polimerit.
“Qentë do të jenë një shtesë e shkëlqyeshme për Njësinë K9 pasiqë do t’i ndihmojë agjencisë në zbatimin e ligjit në identifikimin efektiv të armëve të paligjshme të trafikuara, veçanërisht ato nga polimeri”, njofton UNDP.
Në këtë aktivitet, ndër të tjerë, do të marrin pjesë ministri i Punëve të Brendshme Agim Veliu, drejtori i Përgjithshëm i Policisë Rashit Qalaj, Përfaqësuesja e Përhershme e UNDP-së Maria Suokko, Ambasadori i Gjermanisë në Kosovë Christian Heldt, Shefja e Zyrës së Bashkimi Evropian në Kosovë Nataliya Apostolova./InLajmi/
