Zëdhënësi i PDK-së, Avni Bytyçi përmes një postimi në Facebook ka thënë se krerët e VV-së janë ideologët e grupit “Syri i Popullit” që u dënuan sot me 41 vjet burgim, që sipas tij janë Albin Kurti dhe Glauk Konjufca.
Bytyçi tutje ka thënë se është shqetësuese kur një parti që synon ta qeverisë vendin, madje mbron anëtarët e organziatës terroriste “Syri i Popullit”, edhe pasi janë dënuar, shkruan InLajmi.
Postimi i plotë:
Lëvizja Vetëvendosje jo vetëm se nuk u distancua nga veprimtaria e grupit terrorist “Syri i Popullit”, por sot e mori në mbrojtje dhe konfirmoi atë që dihej – se ajo e krijoi, e frymëzoi dhe e shtyri këtë grup të eliminojë me vrasje kundërshtarët politikë, duke filluar nga Presidenti Hashim Thaçi, Kryeministri Isa Mustafa dhe Kryeparlamentari Kadri Veseli.
Ideatorët kryesorë politikë e ideologjikë të këtij grupi janë Albin Kurti dhe Kryeparlamentari Glauk Konjufca. Madje, Konjufca, pos lidhjeve partiake, ka edhe lidhje familjare me njërin prej të dënuarve, Sadri Ramabaja.
Me të njëjtën logjikë si “Syri i Popullit”, bashkëshorti i Albulena Haxhiut, e propozuara e VV-së për Ministre të Drejtësisë, kishte ftuar publikisht për vrasjen e ish Kryeparlamentarit Kadri Veseli.
Fatkeqësisht, kur sot qytetarët prisnin nga VV distancim e kërkim falje nga kjo ideologji, ndodhi e kundërta – ata mbrojtën zyrtarisht këtë organizatë terroriste.
Është shqetësuese kur një parti që synon ta qeverisë vendin, madje, mbron anëtarët e organizatës terroriste “Syri i Popullit”, edhe pasi ata u dënuan.
Sidoqoftë, Vetëvendosje le ta bëjë sa më parë Qeverinë dhe institucionet le të jenë sa më shpejt funksionale. Ne mezi presim t’ia nisim opozitarizmit dhe VV-në ta përballim me këtë temë, si dhe me shumë tema të tjera./InLajmi/
