“Dimensionet e Teatrit në Kosovë, tradita përballë formave të reja.”, ishte tema boshte i edicionit të dytë të Konferencës Teatrore, që u zhvillua dje në Institutin Albanoligjik, në organizim të “Cult Clubit” në Prishtinë, ku morën pjesë emra të shquar të teatrit dhe dramaturgjisë kosovare, përfaqësues nga MKRS-ja, aktorë dhe studentë të Fakultetit të Arteve të UP-së, shkruan InLajmi.
Duke i përshëndetur pjesëmarrësit e këtij evenimenti, Prof asc. Elmaze Nura, drejtoreshë e Konferencës, u shpreh se qëllimi i këtij edicioni, është gjetja e formave më adekuate të avancimit të traditave tona teatrore në vend si dhe përtej kufijve. Ajo tha se nga kjo konferencë, (sikur edhe ajo e vitit paraprak me temë “Teatri mes artit dhe politikës”), do të nxjerrën rekomandime, që do të jenë në shërbim të grupeve të interesit dhe institucioneve përkatëse.
Përfillet e dramaturgjisë në trojet shqiptare, veçanërisht në Kosovë, si dhe për rolin dhe ndikimin e Teatrit në emancipinin dhe ngritjen e mëtejme të vetëdijes kulturore e intelektuale të shoqërisë kosovare, foli Prof. Dr. Nebi Islami, i cili shtoi; “Teatrin e shohim të gjallë në një vend të caktuar, prandaj kemi tri shtylla kryesore që e përcaktojnë teatrin; drama si tekst letrar, regjisori dhe aktori”. Profesor Islami theksoi se Drama tek ne fillon me letërsinë, dhe dramën e parë, “Emira” e Santorit e kemi në vitin 1886″.
Prof. Arian Krasniqi, i prezantoi statistikat e prodhimtarisë të shfaqjeve teatrore, me theks të posaçëm se gjatë këtyre 20 viteve të fundit, (1999/2019), edhe pse kemi më shumë Teatro profesioniste, kemi më pak premiera se gjatë viteve 1950/1999, kur edhe janë shfaqur mbi pesëqind premiera.
Në këtë konferencë diskutuan edhe Prof. Fadil Hysaj dhe Prof. Mentor Zymberaj, për përvojën e tyre të çmuar në skenë dhe dramaturgji, si në vend ashtu edhe jashtë vendit.
Po ashtu, në bashkëbisedim me pjesëmarrësit e tjerë, të ftuar në këtë Konferencë, kryesisht student, aktor dhe gazetar, penalistët iu përgjigjen edhe disa pyetjeve që kishin të bëjnë me Teatrin dhe dramaturgjinë.
/InLajmi/Osman Goranci
