Nënkryetari i Lëvizjes Vetëvendosje, Glauk Konjufca, ka thënë se partia e tij ka bërë shumë lëshime në raport me LDK-në.
Konjufca ka treguar se në fillim të bisedimeve me LDK-në prioritet ishte që tavolina e bisedimeve të “shkarkohet” nga disa çështje që nuk janë prioritet.
Ai në RTV Dukagjini ka deklaruar se Lëvizja Vetëvendosje ka bërë pesë kompromise në raport me LDK-në.
“Vetëvendosje ka bërë koncesionin e parë duke e lënë partnerin që të zgjedhë e para ministrinë. Kompromisi i dytë ishte ndarja e barabartë e ministrive me LDK-në. Kjo nuk është pak”.
“Kompromisi i tretë ka qenë që LDK-ja ta ketë zëvendëskryeministrin e parë. Kompromisi i katërt është që Vetëvendosje ka qenë e gatshme ta negociojë edhe postin e Kryetarit të Kuvendit. Ndërsa, kompromisi i pestë ka qenë gjeneroziteti sa i përket akomodimit të programit të LDK-së në qeverisje”.
Nënkryetari i Vetëvendosjes ka deklaruar se këto pesë kompromise nuk janë pak për të shkuar drejt marrëveshjes, Klan Kosova.
Ai ka shtuar se LDK-ja nuk po bën shumë kompromise në lidhje me postin e presidentit, ku edhe sipas tij ka ngecur procesi.
