Nesër pritet të takohen sërish lideri i Lëvizjes Vetëvendosje, Albin Kurti dhe ai i Lidhjes Demokratike të Kosovës, Isa Mustafa.
Kështu kanë thënë brenda Lidhjes Demokratike të Kosovës.
Këto burime nuk kanë saktësuar orën e saktë të mbajtjes së këtij takimi, por ka theksuar se dy liderët janë dakorduar për një takim gjatë ditë së nesërme.
”Edhe pse nuk e kanë caktuar orën, pritet që nesër gjatë ditës të takohen edhe njëherë Isa Mustafa e Albin Kurti”, tha ky burim.
Gjithnjë sipas këtij burimi, ndonëse ende nuk ka lëvizje të pozicioneve nga dy partitë, mund të pritet marrëveshje të mërkurën në mbrëmje, ose të enjten paradite, gjegjësisht para fillimit të seancës konstituive të Kuvendit.
Ndërkohë, publikisht drejtuesit e dy partive vazhdojnë të mos lëvizin nga pozicioni i tyre. Në fakt është çështja e presidentit, ajo e cila i ka ndarë dy partitë.
Derisa LDK insiston në këtë post, VV kërkon që në këtë post të vijë dikush apartiak.
Ndryshe, Isa Mustafa ka folur sot për një takim të mundshëm me Kurtin.
Ai në 30 vjetorin e LDK-së, ka theksuar se dy partitë duhet ta ndajnë pushtetin në mënyrë të barabartë.
Ai tha se e din se LDK dhe VV kanë dallime politike edhe në të kaluarën, por tani janë drejtë rrugës për të gjetur një rrugë për bashkëqeverisje.
“Në përpjekje e tona për bashkëqeverisje jemi të vetëdijshëm për dallimet politike dhe në të kaluarën, por po bëjmë përpjekje të gjejmë rrugë për qeverisje ashtu siç gjetëm rrugë të bëjmë një opozitë të suksesshme”, tha Mustafa.
Ai tha se LDK është e gatshme të bashkëqeverisë me VV duke ndarë përgjegjësitë në mënyrë të barabartë.
“Qeveria jonë e LDK-së dhe qasja jonë bashkë me VV është të ndajmë përgjegjësitë në harmoni me votën të trajtohen gjitha përgjegjësitë dhe të bëjmë balancë të domosdoshëm të pushteteve”, tha ai.
Mustafa tha se LDK nuk dëshiron presione nga askush, duke përfshirë edhe mediet.
“LDK është parti e parë pluraliste në Kosovë, ka traditë demokratike, më së paku meritojmë dhe kemi nevojë për presion politik dhe mediatik në procesin e marrëveshjes e sidomos nga ata që kanë qenë kundër LDK-së dhe që kanë mbrojtur portat e subjekteve tjera”, tha ai.
Ai tha se pret që koalicioni të ndërtohet pa presione dhe pa fushata kundër tyre, ndërsa shton se VV duhet lexuar edhe njëherë rezultatet e 6 tetorit dhe ta vërejnë afërsinë e rezultateve mes dy subjekteve politike.
“Ne kemi dëshirë pa presion dhe pa fushatë kundër VV ta bëjmë një koalicion”, tha ai.
“Ne kemi lexuar qartë rezultatet e zgjedhjeve të 6 tetorit dhe kemi përgjegjësi ndaj këtyre rezultateve dhe duhet edhe VV të lexoj qartë rezultatet që jemi parti se jemi pothuajse barabartë në numër “, shtoi Mustafa, shkruan Gazeta Blic.
Mustafa tha se LDK do përkushtohet të thelloj bashkëpunimin me Shqipërinë, që të jetë një bashkëpunim vëllazëror në mes nesh.
