Open Data Kosovo në bashkëpunim me Odën Ekonomike të Kosovës lansoi sot platformën www.thefutureworkplace.org, një platformë unike për tregun e Kosovës që mundëson analizë të mirëfilltë të sektorit të Teknologjisë Informative në Kosovë.
Kjo platformë përmban të dhëna duke filluar nga të dhëna nga sistemi i arsimit në Kosovë p.sh. sa student janë të diplomuar në fushën e TIK-ut, cilat janë aftësitë të cilat po i përfitojnë studentët nga fusha e TIK-ut, etj. Po ashtu, përmban edhe të dhëna nga sektori i bizneseve në TIK p.sh. numrin e bizneseve në TIK, të ardhurat vjetore të këtyre bizneseve, etj. Këto të dhëna janë marrë nga MASHT-i, MTI-ja dhe ATK-ja.
Gjatë ngjarjes së lansimit të plaformës, fjalimi hyrës u mbajt nga Blerta Thaçi, Drejtoreshë Ekzekutive në Open Data Kosovo, e cila theksoi se si një platformë si The Future Workpace mundëson hapjen e të dhënave të tregut të TIK ne mënyrë që pikërisht ky treg me potencial të madh për tregun e Kosovës të ndikojë pozitivisht në zhvillimin ekonomik të Kosovës. Ndërsa, Berat Rukiqi, Kryetar në Odën Eknomike të Kosovës tha se zhvillimi i platformave të tilla inovative mundëson që analizë të mirëfilltë të tregut të TIK po ashtu duke i shpërndarë këto të dhëna për publikun. Po ashtu, Petrit Selimi, Drejtor Ekzekutiv në Millennium Foundation Kosovo, foli më shumë për ‘Dig Data Challenge’ dhe se si kjo sfidë ka mundësuar analizimin e të dhënave nga sektor të ndryshëm në mënyrë që të inkurajohet vendimmarrja e bazuar në të dhëna, duke përfshirë edhe platformën The Future Workplace.
Pastaj, Paulina Behluli, Zyrtare për Komunikim në Open Data Kosovo, prezantoi platformën dha ka ndarë me publikun këto të dhëna nga platforma:
– Në 10 vitet e fundit ka pasur rritje në regjitrim te bizneseve në fushën e TIK për 187%
– Brenda 5 viteve ka pasur rritje për 49% të të diplomuarve nga Universitetet që operojnë në fushën e TIK
– 1187 biznese në fushën e TIK janë hapur vetëm në vitin 2018
– Ne Kosovë ekzistojnë 810 biznese ne fushën e TIK me qarkullim vjetor mbi 1 milion
– C++ është një teknologji programuese e cila mësohet në kurrikula të Universiteteve mirëpo që kërkohet shumë pak nga tregu i punës
Ndërsa gjatë panelit të diskutimit me temën ‘Rëndësia e të Dhënave të Hapura për Zhvillimin e Mëtutjeshëm të Sektorit të TIK në Kosovë’, Veton Alihajdari, Divizioni për Arsim Profesional dhe për të Rritur nga MASHT, theksoi se është sfidë e madhe që institucionet të analizojnë tregun dhe të kuptojnë se cilat aftësi po kërkohen, në mënyrë që sistemi i edukimit të dizajnohet duke i’u përshtatur kërkesës së tregut. Ndërsa, Irfan Lipovica, Drejtor i Departamentit për Integrim Evropian dhe Koordinim te Politikave, në MTI, tha se është shumë e rëndësishme të ketë të dhëna të cila i orientiojnë institucionet publike se cila fushë të jetë prioritet, dhe se si në bazë të këtyre të dhënave mund të zhvillojnë politika që inkurajojnë zhvillim të mëtutjeshëm. Po ashtu, Nahit Sharku, Zëvendës Drejtor në ATK, foli më shumë për rëndësinë e përditësimit të të dhënave të bizneseve p.sh. numrin i punëtorëve që të vëzhgohet më mirë zhvillimi i bizneseve, dhe po ashtu që të kemi një bazë përmes së cilës një sektor i caktuar mund të analizohet mëmirë.
Platforma “The Future Workplace” është e hapur për përdorim nga gjithë publiku dhe mundëson që të gjitha të dhënat e paraqitura në platformë munden të shkarkohen nga secili përdorues për t’u ripërdorur për qëllime të ndryshme. Në këtë mënyrë, qasja e të dhënave të hapura është integruar në këtë platformë me qëllim që këto të dhëna t’i ndihmojnë të gjithëve, transmeton Kohanet.
Ky version i platformës ‘The Future Workplace’ është versioni fillestar dhe ky lansim shërben për të marr opinionin nga publiu në mënyrë që platforma të përmirësohet që të përmbaj të gjitha të dhënat të cilat na mundësojnë që të kuptojmë më mirë fushën e TIK.
*The Future Workplace është Projekt i financuar nga Millennium Foundation Kosovo / Millennium Challenge Corporation dhe zbatohet nga Open Data Kosovo në partneritet me Odën Ekonomike të Kosovës.
