Avokati Gazmend Halilaj qe i pari që denoncoi rastin për abuzimin seksual të së miturës nga Drenasi. Për këtë ai është në mesin e gjashtë personave që Prokuroria Themelore në Prishtinë iu ka ngritur aktakuzë.
Por Halilaj thotë se sikurse arrestimi edhe kjo është një e padrejtë që po i bëhet atij.
“Para se të denoncoja rastin të gjithë më kanë bërë me dije që të kem kujdes sepse mund të kisha pasoja pasi ishin njerëz të mëdhenj. Por për mua ka qenë me rëndësi aspekti human dhe e kam marrë këtë përgjegjësi pa asnjë interes”.
“Kam arritur ta shpëtojë vajzën nga kthetrat e personave zyrtarë dhe atyre me peshë. Me punën time, rrezikun tim, profesionalizimin tim kam arritur ta godasë këtë rast ani pse sot më kanë ngritur këtë aktakuzë”.
Halilaj në një intervistë për Info Magazine ka thënë se vajza shumë herë është kanosur për ta denoncuar atë, por sipas tij ajo ka deklaruar edhe publikisht se atë e konsideron si vëlla.
“Vajza është kanosur nga ana e institucioneve dhe prokurorisë shumë herë që nëse nuk e denoncon edhe avokatin kemi me të shti në burg edhe ty. Mirëpo, ajo ka thënë se avokatin e kam si vëlla dhe që asnjëherë nuk është kanosur apo shantazhuar nga ana ime”.
“Nëse do të kishte pas diçka nuk do ta kisha zbuluar veprën vetë sepse jam njeri profesional dhe kam përvojë të gjatë në institucionit zbatimit të ligjit dhe kjo vepër që prokuroria ma kanë ngarkuar mua nuk ekziston në kodin penal”.
“Paralajmëroj se do të kërkoj të drejtën time ligjore duke ushtruar kallëzim penal ndaj të gjithë personave përgjegjës edhe pse mund të më arrestojnë sërish”.
Halilaj ritheksoi se në burg u keqtrajtua.
“Mua më kanë arrestuar, më kanë lënë pa bukë, pa ujë dhe pa vetëdije me kanë dërguar në emergjencë. Kjo më është bërë në 48 orëshin e parë nga policia në stacion, ndërsa në gjashtë ditët tjera kam qenë pa ilaçe sepse truri pa ujë nuk ka pas as oksigjen. Ka ardhur mjekja nga Prishtina dhe pasi më ka parë gjendjen jashtëzakonisht të rëndë shëndetësore, pastaj kanë reaguar edhe institucioni i Avokatit të Popullit dhe Këshilli për Mbrojtjen e Lirive dhe të Drejtave të Njeriut”.
“I kanë gjetur të gjitha dëshmitë sepse m’i ka kontrolluar mjekja të gjitha detajet dhe ka gjetur se nuk m’i kanë lënë ilaçet. Krejt këto m’i kanë bërë vetëm si presion për t’u tërhequr”.
“Arrestimi ka ndodhur vetëm një ditë pasi kam bërë kallëzim penal ndaj prokurorit për të njëjtën çështje. Ai ka urdhëruar hetuesit për arrestim dhe ata më kanë kidnapuar, jo arrestuar sepse s’kanë pas të drejtë për këtë”, shkruan klankosova.
Gjashtë të pandehurit për rastin e njohuri si “Drenasi” janë të dyshuar për veprat penale si: “Keqpërdorimi seksual duke keqpërdorur pozitën, autoritetin apo profesionin”, “Nxitja e akteve seksuale me premtim të rrejshëm të martesës”, “Shtytja në ndërprerjen e palejuar e shtatzënësisë” dhe “Frikësimi gjatë procedurës penale”.
