Kryetari i Komunës së Prishtinës, Shpend Ahmeti, ka bërë të ditur se zyrtarja e arrestuar sot nga Policia e Kosovws ka qenë punëtore e institucionit që ai udhëheq.
Përmes një postimi në rrjetin social facebook, Ahmeti ka thënë se para dy javësh, gjatë një kontrolli të brendshëm në Komunën e Prishtinës, janë gjetur vërtetime të rrejshme e tatimit në prone nga zyrtarja.
Ahmeti thotë se nuk do të tolerojë shkelje të tilla nga zyrtarët komunalë “pa marr parasysh pozitat e pasojat”.
Policia e Kosovës, gjatë ditës së sotme, njoftoi për arrestimin e zyrtares së Komunës në Prishtinës.
“Pas hetimeve disa javore, hetuesit e NJRHKEK-së kanë ardhur në përfundim se e dyshuara N. D., viti i lindjes 1980, f/k/sh, me qëllim të përfitimit të dobisë pasurore për vete, ka keqpërdorur pozitën e saj. Nga muaji mars deri në tetor 2019, ka lëshuar vërtetime të pagesave të tatimit në pronë pa dëshminë se personat në fjalë janë të liruar nga kjo taksë prej 10 euro (vërtetime për regjistrimin e automjeteve)”, thuhet në komunikatën e Policisë. /InLajmi/
