Kryetari i Lidhjes Demokratike të Kosovës [LDK], Isa Mustafa, së fundi ka folur lidhur me bisedimet për koalicion qeverisës me Vetëvendosjen ku i përfshirë në grupet punuese është edhe kryetari i Gjilanit Lutfi Haziri.
Ai e ka konfirmuar praninë e Hazirit në këto grupe punuese, por duke shtuar se ky nuk është emërim i veçantë dhe se ai nuk do të drejtojë dialogun mes dy partive.
Në një bisedë me Gazetën Express, Mustafa shprehet më se i bindur se brenda partisë të cilën e udhëheq nuk ka njerëz që e kundërshtojnë një koalicion të mundshëm me Vetëvendosjen.
“Në udhëheqësin e LDK-së nuk kemi njerëz të veçantë, të cilët e preferojnë dhe të tillë që e kundërshtojnë një koalicion të mundshëm me Lëvizjen VV. Kemi vendimin e Këshillit të Përgjithshëm me të cilin shprehet vullneti të negociohet për një koalicion me VV dhe jo me PDK-në.” – thotë ai.
Sa i përket emërimit të Lutfi Hazirit si shef të negociatave në partinë e tij, Mustafa thotë se nuk kanë bërë emërime të veçanta, pasi që dialogu përfaqësohet nga ai. Për Hazirin thotë se e ka parë të arsyeshme që të kyçet në dialog meqë mban pozitën e nënkryetarit në parti.
“Këto janë koordinatat tona. LDK nuk ka bërë emërime të veçanta për drejtues të dialogut, por unë si Kryetar përfaqësoj LDK-në dhe caktoj përfaqësuesit tanë në këtë proces. Deri tani, kryesisht janë marrë z. Avdullah Hoti dhe z. Lumir Avdixhiku, të cilët janë anëtarë të Kryesisë dhe kanë punuar drejtpërsëdrejti ne Program, tani e kam vlerësuar të arsyeshme që të kyçet edhe z. Lutfi Haziri si nënkryetar i LDK-së”, shton Mustafa, transmeton Periskopi.
LDK dhe Vetëvendosje dolën të parat në zgjedhjet e parakohshme të 6 tetorit, ndërkohë që tashmë kanë kaluar 23 ditë që nga përfundimi i ditës së zgjedhjeve. Kujtojmë se në vitin 2014, Mustafa e kishte formuar koalicionin VLAN bashkë me partnerët e partive tjera vetëm dy ditë pas përfundimit të zgjedhjeve.
