Të dielën në orët e hershme të mëngjesit, në rrugën Ferizaj – Lipjan, janë plagosur tre persona nga të shtënat me armë zjarri.
Në mesin e të plagosurve është edhe djali i kryetarit të Shtimes, Naim Ismajlit.
Kjo është konfirmuar nga vet Ismajli, i cili ka thënë se djali i tij nuk ka qenë i përfshirë në zënkë, por sipas tij ishte duke pirë kafe me shoqëri.
Ai ka thënë se djali i tij është qëlluar nga një plumb qorr.
“Po është e vërtetë, djali ka qenë në një lokal me shoqëri të vet dhe nuk ka qenë i përfshirë në atë zënkë. Është qëlluar nga një plumb qorr”, ka thënë Ismajli.
Ndërkohë rastin e plagosjes e ka konfirmuar edhe zëdhënësja e policisë në Rajonin e Prishtinës, Flora Ahemti, shkruan lajmi.net
“Me datën 20.10.2019, rreth orës 03:00, në rrugën Ferizaj – Lipjan, saktësisht në një lokal, është raportuar për të shtëna me armë zjarri, ku lëndime trupore nga arma e zjarrit kanë marrë tre persona. Të njëjtit janë dërguar për tretman mjekësor. Aktualisht policia është duke punuar për arrestimin e personave të dyshuar si dhe sqarimin e rrethanave që lidhen me rastin”, ka thënë Ahmeti.
