Gjatë ditës së sotme u raportua se kryeministri i Maqedonisë së Veriut, Zoran Zaev, ka dhënë dorëheqje nga pozita e shefit të ekzekutivit. Mirëpo një gjë e tillë është demantuar nga zyrtarë të partisë së Zaevit.
Në një përgjigje dhënë për Gazetën “Zëri” deputeti i LSDM-së, Muhamed Zekiri, ka thënë se një lajm i tillë është krejtësisht i pavërtetë.
“S’ka dhënë dorëheqje, dezinformatë është”, ka deklaruar Zekiri.
Në medie sot u raportua se Zaev ka marrë vendim që ta lëshojë pozitën e kryeministrit pasi që vendet anëtare të BE-së nuk kanë arritur një marrëveshje për fillimin e negociatave të anëtarësimit me Maqedoninë e Veriut dhe Shqipërinë, shkruan zëri.
Ndonëse në Samitin e BE-së dominoi qëndrimi se Shqipërisë dhe Maqedonisë së Veriut duhet t’iu jepet vendimi pozitiv, liderët e Bashkimit Evropian nuk ia dolën që të arrijnë konsensus rreth kësaj çështjeje.
