Deputeti që cilësohej si deputet i “përjetshëm”, i Kuvendit të Kosovës, nuk do të jetë më pjesë e ulëseve të parlamentit.
Kjo pasi që, sovrani në zgjedhjet e 6 tetorit vendosi ta largojë që të jetë pjesë e legjislaturës së VII-ë, Xhavit Halitin, njërin ndër figurat më të rëndësishme dhe konstante të Partisë Demokratike të Kosovës.
Haliti, mbeti jashtë. E kjo shënon herën e parë të tij jashtë këtij institucioni shtetërorë, pasi që, për tu bërë deputet i kësaj legjislature atij i janë dashur mbi 7500 vota të cilat nuk arriti t’i marr. Madje befasia e madhe ishte në kryeqytet ku ai siguroi vetëm 734 vota.
Xhavit Haliti, ka qenë gjithmonë deputet i PDK-së. Ai ishte edhe nënkryetar i Kuvendit të Kosovës.
Por, duket qartë se në këto zgjedhje nuk ia mbushi më syrin sovranit që ta votojnë, e kjo mbase se herë pas herë Haliti ka qenë pjesë e disa skandaleve në Kuvend. Kur jemi te skandalet kujtojmë atë të viti 2018-të, kur e sulmoi fizikisht ish-deputetin e LDK-së, Arben Gashin.
Pas kësaj, Prokuroria e Shtetit, nisi hetimet. Dhe 3 muaj më parë Prokuroria Themelore në Prishtinë, ngriti aktakuzë ku u ngarkua me veprën penale ‘sulm’.
Përveç kësaj, ish-deputeti Xhavit Haliti, dyshohet se është i përfshirë në rastin “Fajdet”. Madje janë disa momente kur mashtruesit Rrahim Hashimi dhe Kadri Rexhepi, e lakojnë emrin e Xhavit Halitit. Rexhepi dhe Hashimi i marrin nga Dalladaku 50 mijë euro për t’ia dërguar Halitit. Pas dy javësh plani ishte t’i dorëzohen në total 120 mijë euro. Mirëpo, krejt kjo e nxori si viktimë Xhavit Halitin, pasi që, ky i fundit nuk kishte lidhje me Rrahim Hashimin dhe Kadri Rexhepin, dhe emri i ishte përmendur pasi që, Haliti konsiderohej si person i fuqishëm në vend, shkruan Insajderi.
