Në mesin e gjuhëve të huaj që ligjërohen në Fakultetin e Filologjisë në Universitetin e Prishtinës, nga 4 tetori hyri si lëndë zgjedhore edhe gjuha spanjolle, shkruan InLajmi.
Me praninë e kësaj lënde, studentët do të kenë mundësi që ta mësojnë gjuhën spanjolle gjatë studimeve universitare.
Ligjëratën e parë të kësaj lënde e mbajti profesori nga Universiteti i Tiranës Serxhi Rama, për studentët e Universitetin të Prishtinës.
Dekanja e Fakultetit të Filologjisë, Lindita Rugova tha për InLajmin, se kjo gjuhë ka hyrë si lëndë zgjedhore dhe do të ligjërohet nga ky vit akademik.
“Gjuha Spanjolle është lëndë e cila tashmë është në programe të studimit te Fakultetit të Filologjisë si gjuhë e huaj dhe në momentin që zgjedhjet për vitin e parë bëhet e obligueshme, ndërkaq për vitet tjera të Filologjikut mund të llogaritet si lëndë opsionale”, tha dekanja.
Rugova, po ashtu shtoi se arsyeja pse ka vendosur që ta inicioj gjuhën spanjolle në Fakultetin e Filologjisë, është për shkak të shtrirjes së madhe të kësaj gjuhë në të gjithë botën si dhe nevoja që në UP të ketë sa më shumë gjuhë të huaja që ligjërohen.
“Idenë e kam iniciuar nga popullariteti i spanjishtës në botë dhe nga dëshira për të pasur më shumë prani të një gjuhe kaq të njohur botërore edhe në Kosovë”, shtoi tutje Rugova.
Dekanja shtoi më tutje se në një të ardhme të afërt mund të hapet edhe një program i ri i kombinimit të gjuhëve romane i quajtur romanistika që iu mundëson studentëve që të mësojnë disa gjuhë gjatë studimeve.
“ Në të ardhmen mund të mendojmë edhe për një kombinim të gjuhëve romane dhe hapjen e një programi të romanistikës, do të ishte më së i kërkuar nga të rinjtë që duan t’i mësojnë 2-3 gjuhë brenda një programi të studimit” u shpreh dekanja.
Drejtuesi i Qendrës për Arsim të Kosovës, Dukagjin Pupovci, njëherësh njohës i çështjeve të arsimit tha për InLajmin, se gjuha spanjolle ja vlen të mësohet dhe shpreson që të ketë sa më shumë folës të kësaj gjuhe në vendin tonë.
“Gjuha spanjolle ja vlen të mësohet dhe shpresoj që të kemi sa më shumë folës të kësaj gjuhe në Kosovë. Nuk nevojitet aq shumë për tregun e punës në Kosovë, por ky nuk është qëllimi i vetëm i të mësuarit të një gjuhe të huaj”, tha Pupovci.
Tutje Pupovci, ka shtuar se paisja e qytetarëve më njohuri për gjuhët dhe kulturat e ndryshme e bënë Kosovën të rëndësishme për botën dhe se nuk ndërlidhet mësimi i gjuhës spanjolle me politikat e Spanjës karshi vendit tonë.
“Gjithsesi, njohja e gjuhëve dhe kulturave të huaja nga ana e qytetarëve të saj e bën Kosovën edhe më të rëndësishme për botën. Megjithatë nuk e kisha ndërlidhur mësimin e gjuhës spanjolle me qëndrimet politike të Spanjës dhe shumicës së vendeve Latine ndaj Kosovës” shtoi tutje Pupovci.
Edhe profesori universitar Bardh Rugova, e cilëson si shumë të rëndësishme mësimin e gjuhës spanjolle dhe hapjen e horizonteve tjera nga ana e studentëve kosovar.
“Natyrisht, njohja e gjuhëve, gjithnjë do të mundësojë edhe perspektivë ekonomike. Mirëpo, universitetet janë themeluar për dy komponente: ajo ekonomike (tregu i punës) dhe iluminuese. Universitetet nuk janë vetëm për treg pune, sepse atëherë do të shndërroheshin në shkolla zanati. Vlera e universiteteve është, para së gjithash, për iluminimin e përgjithshëm të shoqërisë, për kërkimet studimore dhe hapjen e horizonteve”, tha Rugova.
Po ashtu edhe Rugova, tha se njohja e gjuhës spanjolle nuk duhet të ngatërrohet me çështjet politike të shteteve.
“Futja e spanjishtes nuk ka të bëjë me çështje politike. Universitetet duhet të jenë vende që nxisin dhe krijojnë mendim dhe zhvillojnë kulturë. Politikat janë çështje emergjencash që përkasin në të tjera nivele”, tha tutje profesori Rugova.
Edhe studentët e Universitetit të Prishtinës e kanë mirëpritur futjen e lëndës spanjolle në programet e studimit dhe e cilësojnë si shumë të rëndësishme që studentet të kenë njohuri për shumë gjuhë të botës.
Genita Tahiri, studente në Fakultetin e Filologjisë tha për InLajmin, se studentët duhet të kenë njohuri për secilën gjuhë të botës dhe se është një mundësi shumë e mirë që të mësojnë për një gjuhë dhe një kulturë të re.
“Është shumë e nevojshme për secilin student të ketë njohuri elementare për secilën gjuhë. Përfitimet janë që ne mësojmë diçka të re, eksperiencë të re, mësojmë më shumë për një popull për të cilin nuk kemi aq shumë njohuri”, tha studentja.
Ajo tutje shtoi se mësimi i kësaj gjuhe hapë rrugë të reja për punësimin e studentëve të Kosovës në një shtet siç është Spanja.
“Në secilin shtet ekziston marketingu, kështu që nëse në të ardhmen studentët tanë mundën të punojnë në tregun spanjoll dhe për këtë është mirë të paktën të kenë njohuri elementare për gjuhën”, shtoi tutje studentja.
Edhe studentja V.B tha se është shumë e mirëseardhur mësimi i një gjuhe të re, e cila do të iu ndihmoj studentëve të kenë njohuri edhe më shumë.
“Është shumë e mirëseardhur mësimi i gjuhës spanjolle, pasi ka edhe shumë gjuhë të tjera që ligjërohen në Fakultetin e Filologjisë, pse të mos jetë edhe gjuha spanjolle, kjo iu ndihmon shumë studentëve që të kenë njohuri të reja”, tha studentja V.B
Në Fakultetin Filologjik në Universitetin e Prishtinës, deri tani ofrohen kurse të anglishtes, të gjermanishtes, të frëngjishtes, të italishtes, të turqishtes, të persishtes, të arabishtes, nga viti i shkuar edhe të kroatishtes, ndërsa nga ky vit akademik ka filluar edhe me kurse të spanjishtes. Spanjishtja është gjuhë latine të cilën e flasin më shumë se 400 milion folës në botë. Gentiana Mani /InLajmi/
