Norbert Lammert, drejtor i përgjithshëm i Fondacionit gjerman “Konrad Adenauer” (KAS) dhe ish-president i Bundestagut është nderuar në Tiranë me dekoratën “Gjergj Kastriot Skënderbeu” të dhënë nga presidenti Ilir Meta, me motivacionin “Për kontributin e çmuar në forcimin e marrëdhënieve strategjike mes Shqipërisë dhe Gjermanisë, thellimin e bashkëpunimit ndërparlamentar dhe mbështetjen e qëndrueshme të proceseve demokratike dhe rrugëtimit evropian dhe euroatlantik të Shqipërisë”.
Lammert është i ftuar nderi në festimet për 10 vjetorin e aktivitetit në Shqipëri të KAS, i cili vazhdon të ketë në fokus edukimin politik të qytetarëve, dhënien e njohurive mbi demokracinë dhe proceset demokratike.
Presidenti Meta e cilësoi fondacionin gjerman “Konrad Adenauer”, një “institucion shumë të rëndësishëm të Gjermanisë, që i ka shërbyer me përkushtim forcimit të marrëdhënieve strategjike ndërmjet dy vendeve”. Ai tha se, “gjatë 12 viteve, 2005-2017, të drejtimit të Bundestagut gjerman nga Norber Lammert, Shqipëria hyri në NATO, nënshkroi dhe ratifikimin e Marrëveshjen e Asocim-Stabilizimit me BE-në, realizoi lëvizjen pa viza drejt vendeve anëtare të BE dhe mori statusin e vendit kandidat për anëtarësim”.
“Gjermania është një mik dhe partner strategjik, tashmë i pazëvendësueshëm i Shqipërisë. Mbështetja e saj është jo vetëm e qëndrueshme dhe e shtrirë në të gjitha fushat, por edhe jetike për të ardhmen e vendit, ashtu sikurse është jetike për vetë anëtarësimin e Shqipërisë dhe të gjithë rajonit në Bashkimin Evropian”, theksoi Presidenti Meta.
Ai vlerësoi qëndrimin parimor dhe të drejtpërdrejtë të Bundestagut për të siguruar mbështetjen e plotë ndaj procesit të integrimit evropian të Shqipërisë dhe vendimit pozitiv për hapjen e negociatave të hyrjes në BE.
Lidhur me vendimin e Këshillit Evropian, Lammert tha në Tiranë se, “Shqipëria meriton perspektivën evropiane. Rrugëtimi i saj drejt hyrjes në BE do të realizohet atëherë kur të përmbushë kushtet. Ajo çka parlamenti gjerman ka vendosur para disa ditësh tregon angazhimin e tij. Jemi të gatshëm të shoqërojmë në mënyrë konstruktive procesin e integrimit të Shqipërisë, por me pritshmëri të qarta”.
Kryetari i PD-së dhe opozitës jashtë parlamentit, Lulzim Basha, i pranishëm në ceremoninë për 10 vjetorin e KAS e quajti rezolutën me 9 ҫështje të Bundestagut
“Rrugën drejt hapjes së negociatave, udhërrëfyes për daljen nga kjo kriza politike edhe institucionale. Hapja e negociatave garanton një vëmendje të shtuar të BE në Shqipëri, një kontroll më të fortë të funksionimit të institucioneve dhe zgjedhjeve të lira,shkruan DW. U bëjmë thirrje miqve gjermanë që vetëm hapja e negociatave garanton kontroll më të fortë të funksionimit të institucioneve, ndarjes së pushteteve, zgjedhjeve të lira dhe barazisë para ligjit, si garanci për qytetaret e këtij vendi se liritë dhe të drejtat e tyre do të respektohen. Në këto kohë, thënia e Konrad Adenauer se, ‘demokracia nuk mund të merret kurrë si e mirëqenë’, është më aktuale se kurrë më pare në Shqipëri”, tha Basha.
Në Shqipëri, krahas KAS zhvillojnë aktivitetin e tyre edhe dy fondacione të tjera gjermane, si Fridrich Ebert dhe Hans Seidel.
