Komisioni për Sigurinë Kombëtare ka diskutuar në parim Projektligjin për Shtetësinë.
Të ftuar në mbledhjen e këtij Komisioni ishin zëvendësministrja e Brendshme, Rovena Voda, si dhe përfaqësues të tjerë të UNHCR. Zëvendësministrja e Brendshme, Rovena Voda u shpreh se projektligji ka një ndikim të madh jo vetëm për qytetarët që jetojnë brenda Shqipërisë, por edhe për ata që jetojnë jashtë territorit.
Sipas Vodës, miratimi dhe hyrja në fuqi e këtij Ligji do të zgjidhë shumë problematika që kanë lidhje me shtetësinë, shkruan Telegrafi.
“Ky projektligj ka një ndikim shumë të madh për qytetarët që jetojnë në Shqipëri dhe jashtë saj. Është një projektligj i legjislacionit të brendshëm, i cili nuk kërkon të bëjë përafrim me ligjet e BE-së. Ky Ligj do të zgjidhë shumë nga problematikat e lidhura me shtetësinë”, u shpreh Voda.
