Kandidatja për deputete nga radhët e AAK-së, Besa Luzha, përmes një postimi në Facebook ka reaguar ndaj marrëveshjes për koalicion midis LVV dhe LDK-së.
Sipas saj, dakordimi kaq i shpejtë mes këtyre dy partive tregon se po i ofrohemi standardeve më të larta të demokracisë dhe politikëbërjes, shkruan InLajmi.
“Dakordimi kaq i shpejtë dhe në parim, i Albin Kurtit dhe Vjosa Osmanit për bashkëqeverisjen, si rezultat i votës së qytetarëve, jep shpresë në një lloj tjetër të politikëbërjes, dhe e vulos nivelin e lartë qytetar dhe demokratik që u tregua në zgjedhjet e 6 tetorit”, ka thënë kandidatja për deputete, Besa Luzha.
Ajo gjithashtu kërkon nga opozita, të jetë e mirëfilltë, konstruktive dhe korrektuese.
“Shpresoj poashtu që opozita në Kuvend dhe shoqëria civile të jenë një opozitë të mirëfilltë e konstruktive, mbikëqyrëse dhe korrektuese, sepse vetëm kështu i ofrohemi standardeve më të larta të demokracisë dhe politikëbërjes”, ka shkruar Luzha në Facebook.
