Maturantët e Gjimnazit “Frang Bardhi” në Mitrovicë, kanë ndërprerë ekskursionin e tyre në Shqipëri për shkak të tërmeteve të njëpasnjëshme që e kanë goditur këtë vend.
Drejtoresha e Gjimnazit, Zybejde Gogolli konfirmoi për InLajmin, ndërprerjen e shëtitjes së nxënësve si dhe tregoi për gjendjen shëndetësore të tyre.
“Gjatë qëndrimit tonë atje kanë ndodhur tri dridhje të tokës, fatmirësisht asnjë nxënës apo mësimdhënës nuk ka pësuar lëndime, dhe së bashku me stafin e shkollës vendosëm të kthehemi në Kosovë për sigurinë e nxënësve”, tha drejtoresha.
Një maturante e këtij gjimnazi, e cila deshi të mbetet anonim tha për InLajmin, se dridhjet e tokës kanë shkaktuar panik tek nxënësit, duke i bërë ata të frikësohen.
“Jemi frikësuar normalisht edhe nxënësit kanë bërë panik, mirëpo nuk ka pasur asgjë serioze”, tha maturantja.
E në qytetin e Mitrovicës përveç Gjimnazit “Frang Bardhi” janë edhe dy shkolla tjera të mesme të cilat kanë planifikuar shëtitjen në Shqipëri.
Për këtë çështje InLajmi ka kontaktuar Drejtorin e Arsimit në Mitrovicë, Egzon Jashari i cili ka thënë se nuk ende nuk është vendosur se a do të realizohet ekskursioni për shkollat tjera apo jo.
“Është e planifikuar që në fillim të muajit tetor të mbahet ekskursioni edhe për shkollën teknike “Arkitekt Sinani” si dhe shkollën e Mesme të Larte të Mjekësisë “Dr.Xheladin Deda”, mirëpo ende nuk është marrë ndonjë vendim, varësisht nga rrethanat do të vlerësohet edhe shkuarja”, tha Jashari.
I pyetur në atë se a do të ju kompensohen mjetet financiare maturantëve të cilët e kanë ndërprerë ekskursionin, drejtori tha se nuk kanë vendosur ende edhe për këtë gjë.
“Është shqyrtuar edhe mundësia e kompensimit me mjete financiare për nxënësit mirëpo akoma nuk është marrë ndonjë vendim”, u shpreh Jashari.
E shëtitjen në Shqipëri nuk e kanë planifikuar vetëm shkollat e mesme të Mitrovicës, edhe shumë shkolla tjera në Kosovë e kanë në plan program këtë ekskursion.
InLajmi ka kontaktuar Drejtorin e Arsimit Parauniversitar, Alush Rexhepi, për ta pyetur se a do të ndërpriten ekskursionet në Shqipëri për shkollat e tjera të mesme të Kosovës, ky i fundit ka thënë se këto ekskursione nuk organizohen nga Ministria e Arsimit.
“Ministria e Arsimit nuk i organizon ekskursionet, është obligim i Drejtorive Komunale dhe Komunave”, tha Rexhepi.
Ekskursionet në Shqipëri organizohen çdo vit për maturantët e shkollave të mesme, të cilët qëndrojnë atje një javë.Gentiana Mani, /InLajmi/
