Mërgimtari

Atdheu im të lash pa dashje

Dhe ty katund i babës ku jetova

Shtëpi e vjetër ta ktheva shpinën

Me dhimbje në zemër u largova

S’u largova nga dëshira e qejfi

Por nga vuajtja e nga halli

Çdo natë shoh ëndërr që po kthehem

Zemrën po ma përvëlon malli

Toka e huaj më ka rënduar

Të gjata janë ditët dhe netët

Bukës mbrume shijen ia kam harruar

Rrapit të moçëm po i thahen degët

Veç pak ditë të verës mbesin

Të vij me mall e me lot të kthehem

Nostalgjinë dot nuk e shuaj

Tokë e lokës tek ti dua të prehem

Ju bijtë të shqipes që kurbetin doni

Dhe rrugë mërgimi po merrni sot

Që të pasur e krenarë të rroni

Por punë e mund këtu janë kot

Dheu i huaj kafshatë e përlotur

Këtu shqip askush s’po flet

Mos harroni fjalën e të parëve

“Guri rëndon në vend të vet”

Shkruan: Mentor Mani