Sot u mbajt protesta e paralajmëruar e Punëtorëve Teknik të Qendrës Studentore në Prishtinë.
Shkak i kësaj proteste ishte mos pagesa e trustit pensional për punëtorët teknik nga tri kompani që ata kanë punuar në Qendrën e Studentëve për shtatë vite me radhë.
Kryetari i Sindikatës së Pavarur të Sektorit Privat të Kosovës, Isuf Azemi tha për InLajmin se tri kompani ju ka mbetur borxh punëtorëve teknik rreth 40 mijë euro.
“Kërkesa e tyre primare ishte pagesa e trustit pensonal nga tri kompani që kanë operuar në Qendrën Studentore për shtat vjet dhe deri më tani ju kanë mbetur borxh punëtorëve teknik mbi 40 mijë euro” tha Azemi.
Azemi, po ashtu shtoi se punëtorët kanë marrë premtim nga drejtori i Qendrës Studentore , Fatmir Sfishta, se nëse deri me 1 shtator nuk iu paguhet trusti punëtorëv, atëherë këtë do ta bëjë vet ai me mjete personal.
“Pas protestave të shumta, drejtori QS-së Fatmir Sfishta, i ka ftuar në takim punëtorët dhe ka kërkuar nga ata që të mos bëjnë greva, sepse nëse deri me 1 shtator të këtij viti kompanitë nuk i paguajnë obligimet atëherë ai është zotuar se do ta kryej vet me mjete personale”, u shpreh Kryetari.
Mirëpo ai tha se ka kohë që ka kaluar 1 shtatori dhe paratë e trustit nuk janë deponuar në llogaritë e punëtorëve dhe kjo i ka nxitur ata që të vazhdojnë me protesta dhe të hapin procedurë ligjore lidhur me këtë rast.
“Punëtorët kanë hapur procedurë ligjore në Gjykatën Themelore në Prishtinë, po ashtu është njoftuar edhe Inspektoriati i Punës që e ka vërtetuar gjendjen si dhe ka obliguar kompaninë e pastrimit “Beni” që t’i kryej obligimet ndaj punëtorëve, por kjo nuk ka ndodhur” sipas Azemit.
Lidhur me këtë ҫështje është kontaktuar edhe drejtori i Qendrës Studentore, Fatmir Sfishta i cili për InLajmin tha se nuk e din arsyen e protestës sepse ata nuk janë punëtor të Qendrës.
“Nuk e di arsyen e protestës, thirrni përfaqësuesit e Kompanisë “Beni”, unë nuk mundem me i komentu kërkesat e punëtorëve që ju drejtohen atyre, ne i kemi kryer obligimet që i kemi me këtë kompani”, tha Sfishta.
Edhe përfaqësuesit e Kompanisë “Beni” thanë se nuk janë në dijeni për arsyen e protestës së punëtorëve teknik.
“Nuk e di arsyen pse kanë protestuar punëtorët, ne nuk kemi asnjë problem me ta dhe nuk kemi marrë as një kërkesë, protesta nuk është organizuar kundër nesh”, deklaroi përfaqësuesi i kompanisë “Beni”.
E ndër të tjera përfaqësuesi i kësaj kompanie tha se protesta mund jetë organizuar për qëllime tjera të më hershme, kjo protestë nuk ka të bëjë me këtë kompani.
Kryetari i Sindikatës së Pavarur të Sektorit Privat të Kosovës, Isuf Azemi tha se punëtorët kanë vendosur që deri pas përfundimit të zgjedhjeve të mos veprojnë asgjë, ndryshe nga 7 tetori do të hyjnë në grevë nëse nuk merren parasysh kërkesat e tyre.Gentiana Mani, /InLajmi/
