Njëra ndër gratë e kthyera nga Siria Merita Aliu, është shpallur fajtore për organizim dhe pjesëmarrje në grupe terroriste.
Aliu është dënuar me 2 vjet e gjysmë burgim me kusht.
“Shpallet fajtore për organizimin dhe pjesëmarrje në grupe terroriste…i shqipton dënim me kusht me 2 vjet e gjysmë”, ka thënë gjyqtari Kurtaj gjatë leximit të aktvendimit.Ky gjykim ka qenë i shkurtër për shkak që e akuzuara e ka pranuar fajësinë dhe ka hequr dorë nga shqyrtimi i provave gjatë procesit të gjykimit.
Në seancën e parë Aliu pasi e kanë tejkaluar leximin e aktakuzës ka thënë se e pranon fajësinë. “Jam penduar shumë “, ka thënë ajo.
Sipas të akuzuarës ajo e ka kuptuar që ka gabuar. “Me mujt kohën me kthy kurrë nuk e kisha përsëritur”, ka deklaruar ajo para gjyqtarit të departamentit special, Valon Kurtaj, raporton Koha Ditore.
Prokurori special, Naim Abazi ka thënë se pajtohet me pranimin e fajësisë dhe sipas tij është në përputhje me Kodin e Procedurës Penale.
Abazi ka thënë se e akuzuara ka qenë bashkëpunuese me prokurorinë gjatë gjitha fazave të hetimit. Avokatja e Aliut, Leonora Dervishaj Pacolli ka kërkuar nga gjyqtari I çështjes që t’i merr parasysh rrethanat lehtësuese.
Ka thënë se është nënë vetushqyese, e dy vajzave të mitura, e njëra nga to është e sëmurë.
“Propozoj një dënim me të butë, dënim me kusht”, ka thënë ajo. Gjykata ka kërkuar 20 minuta koha për të marrë vendim në lidhje me dënimin për këtë rast./InLajmi/
